អឺរ៉ុប៖ ក្រោយបញ្ចប់ត្រឹមលទ្ធផលស្មើគ្នា ១-១ ជាមួយក្រុមជម្រើសជាតិប៊ុលហ្គារីយប់មិញនេះ ក្រុមជើងឯក EURO 2020 អ៊ីតាលី បានតាមស្មើកំណត់ត្រាពិសេសមួយរបស់ក្រុមជម្រើសជាតិអេស្ប៉ាញ ពោលគឺជាក្រុមដែលមិនស្គាល់ពាក្យចាញ់សោះចំនួន ៣៥ប្រកួតជាប់គ្នា។ កំណត់ត្រារបស់អេស្ប៉ាញនេះ ធ្វើបានកាលពីឆ្នាំ២០០៧ ដល់ ២០០៩ កំឡុងការឈ្នះជើងឯកទ្វីបអឺរ៉ុប និងជម្រុះ World Cup នៅអាហ្វ្រិកខាងត្បូង។ យ៉ាងណាក្តី ការតាមស្មើកំណត់ត្រាអេស្ប៉ាញ ដោយរបូត៣ពិន្ទុសម្រាប់ក្រុមជម្រើសជាតិអ៊ីតាលីនេះ មិនមែនជារឿងគួរឱ្យរីករាយឡើយសម្រាប់អ្នកគាំទ្រកាលពីយប់មិញនេះ។ 

ជាការប្រកួតលើកដំបូងក្រោយគ្រងជើងឯកអឺរ៉ុបកាលពីខែកក្កដាកន្លងទៅ ក្រុមជម្រើសជាតិអ៊ីតាលីនៅតែបន្តធ្វើបានល្អ ដោយបានបើកការនាំមុខមុនទៅលើក្រុមភ្ញៀវប៊ុលហ្គារី នៅនាទីទី១៦ ពីគ្រាប់បាល់របស់ខ្សែប្រយុទ្ធស្លាប Federico Chiesa ដែលទើបចូលរួមជាមួយ Juventus កាលពីពេលថ្មីៗនេះ។ យ៉ាងណាក្តី ក្រុមភ្ញៀវប៊ុលហ្គារី បានតាមស្មើវិញក្នុងវគ្គទី១ដដែលនេះ ដោយកីឡាករ Atanas Iliev នៅនាទីទី៣៨។

លទ្ធផលស្មើនេះ អ៊ីតាលីហាក់តានតឹងក្នុងការប្រជែងកៅអីបង្ហាញខ្លួននៅក្នុងព្រឹត្តិការណ៍ World Cup ឆ្នាំ២០២២ នៅកាតា ដោយឆ្លងកាត់ ៤ប្រកួត ឈ្នះ ៣ និងស្មើ ១ មាន១០ពិន្ទុ តាមពីក្រោយដោយស្វីស ២ប្រកួតមាន ៦ពិន្ទុ, អៀរឡង់ខាងជើង ៣ប្រកួតមាន ៤ពិន្ទុ, ប៊ុលហ្គារី ៤ប្រកួតមាន ២ពិន្ទុ និងលីទុយអានី បាតតារាងមិនទាន់មានពិន្ទុរាប់នៅឡើយ។

អ៊ីតាលី នឹងត្រូវបំបែកកំណត់ត្រារបស់អេស្ប៉ាញ ដោយជួបជាមួយក្រុមម្ចាស់ផ្ទះស្វីសនៅប្រកួតបន្ទាប់ នាកីឡដ្ឋាន St. Jakob Park នាថ្ងៃទី០៦ ខែកញ្ញាខាងមុខនេះ ខណៈក្រុមប៊ុលហ្គារី នឹងត្រូវទទួលក្រុមភ្ញៀវលីទុយអានី៕